Боздид аз ҷараёни корҳо дар Кони рақами 17-и Неругоҳи обии «Роғун»
27 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ аз раванди корҳо дар кони рақами 17-и иншооти бузургтарини гидроэнергетикии аср - Неругоҳи обии «Роғун»шинос шуданд.
Дар кони рақами 17 маводи гилхок тавассути 8 дастгоҳи муосир ва 3 корхонаи ширкати паймонкори Лоти 2 “Вибилд” бо ҷалби мутахассисони Ҷамъияти саҳҳомии кушодаи “Тоҷикгидроэлектромонтаж” коркард ва захира карда мешавад.
Ба Пешвои миллат муҳтарам Эмомалӣ Раҳмон иттилоъ дода шуд, ки барои коркарди гилхок дар 4 қитъаи кони рақами 17 дастгоҳу таҷҳизоти муосир гузошта шудааст, ки тавассути онҳо ин мавод бо андозаҳои 0-20, 0-50 ва 0-200 миллиметр истеҳсол карда мешавад.
Иқтидори лоиҳавии ҳар як дастгоҳи коркарди гилхок аз 50 то 100 тоннаро дар як соат ташкил медиҳад. Чун дигар қитъаҳои сохтмонӣ коргарону мутахассисони соҳибтахассус бо истифода аз мошину механизмҳои муосир коркард ва захираи гилхокро дар кони рақами 17 бо сатҳу сифати баланд ба анҷом мерасонанд.
То ҳол дар кони мазкур 1,5 миллион метри мукааб гилхок коркард ва захира гардидааст.
Гилхоки коркардшуда дар ядрои сарбанди неругоҳ бо мақсади мустаҳкамнамоӣ ва обногузар намудани он истифода карда мешавад. Мувофиқи лоиҳа ҳаҷми гилхок дар ядрои сарбанд 7,5 миллион метри мукаабро ташкил медиҳад ва то сатҳи 1110 метр 3,35 миллион метри мукааб хобонида мешавад.
Тибқи талабот ва меъёрҳои сохтмонӣ баъди ба анҷом расидани корҳои бетонӣ дар ядрои сарбанд хобонидани гилхок моҳи июни соли равон аз сатҳи 984 метр шуруъ гардид. Ҳоло дар кон 67 мошини боркаш бо иқтидори вазнбардории аз 40 то 90 тонна ба кашонидани гилхок то минтақаи ядрои сарбанд машғул аст.
Иттилоъ дода шуд, ки аз моҳи июн то имрӯз аз кони рақами 17 дар ядрои сарбанд 350 ҳазор метри мукааб гилхок хобонида шудааст.
Ҷиҳати коркард ва захираи гилхок ҳоло дар кони рақами 17 270 нафар мутахассисон дар ду баст шабонарӯзӣ заҳмат мекашанд.
Аз ҷониби Ҷамъияти саҳомии кушодаи “Тоҷикгидроэлектромонтаж” барои сохтмони Неругоҳи обии “Роғун” дар қитъаҳои гуногуни неругоҳ зиёда аз 6 ҳазору 200 нафар кормандону муҳандисон ва беш аз 950 техникаю механизмҳои муосир ба кор ҷалб шудааст.
Мавриди таъкид аст, ки корҳои сохтмонӣ дар ин иншооти гидроэнергетикии кишвар лаҳзае қатъ нагардида, бунёдгузорони Неругоҳи обии “Роғун” бо ҳисси баланди ватандӯстӣ, садоқату мардонагӣ ва азму иродаи устувор шоҳкорӣ менамоянд.
Президенти Ҷумҳурии Тоҷикистон муҳтарам Эмомалӣ Раҳмон аз фаъолияти назарраси коргарону мутахассисон дар кони рақами 17 дар самти коркард ва захираи гилхок изҳори қаноатмандӣ намуда, барои омодасозии босифати гилхок, таъмини саривақтии минтақаи ядрои сарбанд бо он ва таҳкими раванди корҳои сохтмонӣ ба масъулон дастуру супоришҳои мушаххас доданд.
Зимни боздид аз Неругоҳи обии Роғун Сарвари давлат муҳтарам Эмомалӣ Раҳмонро ҳамчунин Сарвазири кишвар муҳтарам Қоҳир Расулзода ва роҳбарони вазорату идораҳои дахлдор ҳамроҳӣ намуданд.
